Trajneri i Barcelonës, Hansi Flick, ka komentuar situatën në krye të tabelës së La Ligës, duke theksuar se nuk ndien presion nga rivalët e Real Madridit, pavarësisht diferencës minimale mes dy skuadrave në garën për titull.
Pas 20 javësh të zhvilluara në kampionat, Real Madridi ndodhet vetëm një pikë prapa Barcelonës, duke e bërë edhe më të fortë konkurrencën për vendin e parë. Megjithatë, tekniku gjerman i katalunasve shfaqet i qetë dhe i përqendruar te puna e ekipit të tij, duke vënë theksin te fakti se sezoni është ende i gjatë.
“Ka ende shumë punë për të bërë. Do të shohim se çfarë do të ndodhë. Sezoni është i gjatë dhe çdo ndeshje ka rëndësinë e saj”, ka deklaruar Flick gjatë konferencës për media. Ai gjithashtu u shpreh i pasigurt nëse do ta ndjekë përballjen mes Villarrealit dhe Real Madridit, duke theksuar fokusin e tij te skuadra e Barcelonës.
Në lidhje me ndeshjen e radhës në La Liga, ku Barcelona do të përballet në shtëpi me Real Oviedon, Flick kërkon një reagim të menjëhershëm nga skuadra e tij dhe synon fitoren.
“Po luajmë në shtëpi dhe duam të fitojmë. Është diçka që varet vetëm nga ne. Në ndeshjet e fundit kundërshtari ka shënuar gjithmonë i pari dhe kjo është diçka që duam ta shmangim”, ka përfunduar trajneri gjerman.
Barcelona synon të ruajë kryesimin në kampionat, ndërsa çdo hap i gabuar mund të ndikojë drejtpërdrejt në garën e fortë për titull me rivalët madrilenë.
