Ministria e Shëndetësisë e Spanjës njoftoi sot se një shtetas spanjoll, i evakuuar nga anija turistike Hondius dhe i izoluar në një spital në Madrid, ka rezultuar pozitiv me hantavirus.
Ky shtetas është një nga 14 spanjollët që ndodheshin në bordin e MV Hondius dhe që prej 10 majit janë vendosur në karantinë në Spitalin Qendror të Mbrojtjes Gomez Ulla në Madrid.
Sipas autoriteteve, pacienti është identifikuar si kontakt i ngushtë përmes monitorimit epidemiologjik të nisur pas zbulimit të rastit të parë në anijen turistike.
Pas konfirmimit të infektimit, ai u transferua në Njësinë e Izolimit të Nivelit të Lartë të spitalit (UATAN), ku po mbahet nën mbikëqyrje të specializuar mjekësore dhe në përputhje me masat e biosigurisë të parashikuara për raste të tilla.
Me këtë rast të ri, numri i të infektuarve me hantavirus mes pasagjerëve spanjollë dhe anëtarëve të ekuipazhit të anijes është rritur në dy.
Ministria e Shëndetësisë theksoi se rasti është zbuluar brenda sistemit ekzistues të izolimit dhe kontrollit, duke siguruar se nuk ka ndryshim të nivelit të rrezikut për popullatën e përgjithshme dhe as të masave epidemiologjike aktualisht na zbatim.
