Të paktën 96 persona kanë humbur jetën pasi një stuhi e fuqishme goditi shtetin verior indian të Uttar Pradesh, e shoqëruar me reshje të dendura shiu, breshër dhe vetëtima ditën e djeshme, thanë zyrtarët.
Stuhia përfshiu pesë distrikte, duke shkulur pemë dhe tabela reklamash, të cilat u përplasën me automjete. Ajo ndërpreu gjithashtu rrjetet celulare në shumë zona, duke penguar operacionet e shpëtimit dhe ndihmës humanitare, si dhe duke vështirësuar vlerësimin e plotë të dëmeve nga autoritetet.
Zyrtarët fillimisht njoftuan për 89 viktima, të shkaktuara nga incidente të lidhura me stuhinë, rrufetë dhe reshjet e shiut, por më vonë shifra u rrit në 96. Mbi 50 persona të tjerë raportohen të plagosur.
Një tjetër zyrtar deklaroi se shumë prej viktimave humbën jetën pasi u goditën nga pemët e rrëzuara ose nga shembja e mureve të banesave.
Në distriktin Prayagraj, banorët përshkruan skena paniku ndërsa erërat e forta përshkuan lagjet.
“Stuhia erdhi papritur dhe qielli u errësua plotësisht brenda pak minutash”, tha një banorë për Associated Press . “Çatitë prej kallaji fluturonin dhe njerëzit vraponin brenda. Ne mund të dëgjonim pemët që binin gjatë gjithë mbrëmjes”,
