Në javën e fundit të sezonit 1985/86 të Ligës së Parë të ish-Jugosllavisë, më 14 qershor 1986, Fadil Vokrri zhvilloi ndeshjen e fundit me fanellën e Prishtinës, para transferimit të tij te Partizani i Beogradit. Takimi historik mbetet një nga momentet më të rëndësishme në historinë e klubit prishtinas dhe futbollit kosovar.
Prishtina u përball me Vardarin e Shkupit në stadiumin e qytetit, në një sfidë që përfundoi pa gola, me rezultatin 0:0. Në tribuna ishin të pranishëm rreth 10 mijë tifozë, të cilët kishin ardhur për ta përshëndetur kapitenin legjendar në paraqitjen e tij të fundit me bardhekaltrit.
Skuadra vendase pati mundësi ideale për të kaluar në epërsi që në minutën e katërt të ndeshjes, por penalltia e Fadil Muriqit u ndal nga portieri debutues i Vardarit, Mutibariq. Ai moment konsiderohet si pika kyçe e takimit, pasi Prishtina nuk arriti më ta gjejë rrugën e rrjetës.
Sipas raportimeve sportive të asaj kohe, prishtinasit nuk treguan nivelin e pritur në ndeshjen lamtumirëse të Vokrrit. Mysafirët nga Shkupi u vlerësuan për paraqitjen më të mirë në fushë, ndërsa zhgënjimi i tifozëve vendas u ndje deri në fund të sfidës.
Në fund të atij edicioni, Prishtina e mbylli kampionatin në vendin e 11-të me 32 pikë të grumbulluara. Ndërkohë, ajo ndeshje mbeti në histori si paraqitja e fundit e Fadil Vokrrit me fanellën e Prishtinës, para se të niste një kapitull i ri në karrierën e tij në futbollin jugosllav.
