Edicioni 2025/26 po rezulton historik për Vedat Muriqin në aspektin individual, por jo edhe për skuadrën e tij. Sulmuesi kosovar ka realizuar 22 gola në La Liga dhe është ndër lojtarët më të spikatur të kampionatit spanjoll këtë sezon.
Muriqi madje u përfshi edhe në ekipin më të mirë të sezonit në La Liga, përkrah emrave si Lamine Yamal dhe Kylian Mbappe, duke konfirmuar formën fantastike që po kalon me Mallorcan.
Megjithatë, pavarësisht paraqitjeve të tij të jashtëzakonshme, Mallorca po përballet seriozisht me rrezikun e rënies nga elita spanjolle. Dy xhiro para fundit të kampionatit, skuadra ndodhet në vendin e 18-të me 39 pikë, pozitë që dërgon direkt në kategorinë e dytë.
Gara për mbijetesë është bërë dramatike, pasi disa skuadra ndodhen shumë pranë njëra-tjetrës në tabelë. Mallorca do të luajë një ndeshje vendimtare ndaj Levantes në udhëtim, takim që mund të përcaktojë fatin e sezonit.
Pozita aktuale e Mallorcas ka ngritur shumë pikëpyetje, pasi skuadra nuk ka arritur të përfitojë maksimalisht nga forma fantastike e Muriqit. Të kesh një sulmues me 22 gola dhe të luftosh për mbijetesë konsiderohet një paradoks i madh në futbollin spanjoll.
Në rast të rënies nga La Liga, e ardhmja e Muriqit mund të ndryshojë plotësisht. Mediat turke kanë raportuar më herët për interesimin e Fenerbahçes, ndërsa emri i tij është lidhur edhe me klube të tjera evropiane.
