Albin Krasniqi është rikthyer te Prishtina dhe do të jetë pjesë e skuadrës deri në fund të këtij sezoni, në formë huazimi nga klubi ukrainas Kolos Kovalivka.
Futbollisti 24-vjeçar kishte qenë një nga emrat kryesorë të bardhekaltërve gjatë periudhës së tij të parë, ku regjistroi 60 ndeshje zyrtare, me 10 gola dhe 10 asistime. Rikthimi i tij pritet të sjellë forcë shtesë në fazën ofensive, falë njohjes së ambientit dhe përvojës me klubin.
Momenti kulmor i Krasniqit me Prishtinën mbetet goli vendimtar në finalen e Kupës së Kosovës, që i siguroi trofeun klubit.
Pas rikthimit, Krasniqi u shpreh i lumtur që do të mbajë sërish fanellën bardhekaltër dhe theksoi se do të japë maksimumin për të ndihmuar ekipin drejt objektivave të sezonit.
