Cristiano Ronaldo mund të vazhdojë karrierën deri në moshën 45-vjeçare dhe madje të luajë në Kupën e Botës 2030 përkrah djalit të tij. Kështu ka deklaruar ish-bashkëlojtari i tij te Manchester United, Eric Djemba-Djemba.
Sulmuesi portugez, aktualisht pjesë e Al Nassr, vazhdon të sfidojë moshën me paraqitjet e tij dhe sipas Djemba-Djembas, ai ka gjithçka për të qenë pjesë e Portugalisë edhe në Botërorin e vitit 2030.
“Unë besoj sinqerisht se Cristiano Ronaldo mund të luajë deri në moshën 44 ose 45-vjeçare. Nuk jam aspak i befasuar nga ajo që po bën ai, sepse e njihja që kur ishte 17-vjeçar”, është shprehur ai për “BetVictor”.
Botërori 2030 do të kishte një domethënie të veçantë për Ronaldon, pasi Portugal është një nga bashkëorganizatorët e turneut.
Djemba-Djemba e ka quajtur të jashtëzakonshme mundësinë që Ronaldo të luajë së bashku me të birin, Cristiano Ronaldo Jr., i cili aktualisht është pjesë e akademisë së Al Nassr dhe po konsiderohet si një nga talentet më premtuese të brezit të tij.
“Do të ishte fundi perfekt i karrierës së tij dhe një moment i jashtëzakonshëm për futbollin portugez. Dhe imagjinoni nëse Cristiano Jr. do të ishte aty. Do të ishte e pabesueshme”, shtoi ai.
Cristiano Jr., 15 vjeç, ka luajtur tashmë nëntë ndeshje për Portugalinë U16 dhe ka realizuar tre gola, ndërsa raportimet e fundit e lidhin atë me një transferim të mundshëm te Real Madrid.
