Real Madrid ka marrë një tjetër lajm negativ pas humbjes 2-1 ndaj CA Osasuna. Klubi madrilen ka konfirmuar zyrtarisht se mesfushori spanjoll, Dani Ceballos, ka pësuar një dëmtim muskulor në soleusin e këmbës së djathtë.
Sipas raportimeve të COPE, 27-vjeçari pritet të mungojë rreth shtatë javë, çka do të thotë se ai do të humbasë disa nga përballjet vendimtare të sezonit, si në kampionat ashtu edhe në garat e tjera.
Dëmtimi vjen në një moment delikat për Ceballosin, i cili në ndeshjen ndaj Osasunës ishte i përfshirë në aksionin që çoi te goli vendimtar i kundërshtarit, pas një pasimi të gabuar. Mesfushori më pas kërkoi falje publike për gabimin, duke marrë përgjegjësinë për momentin vendimtar të takimit.
Edhe pse nuk ishte titullar i padiskutueshëm në planet e trajnerit, mungesa e tij kufizon alternativat në repartin e mesfushës për “Los Blancos” në një fazë kyçe të sezonit.
Ndërkohë, raportet nga Spanja sugjerojnë se Real Madridi mund të shqyrtojë shitjen e tij gjatë afatit kalimtar veror për rreth 10 milionë euro, duke lënë të hapur mundësinë që aventura e Ceballos në “Santiago Bernabéu” të jetë drejt fundit.
