Sulmuesi i Real Madrid, Kylian Mbappé, ka konfirmuar se ka lënë pas plotësisht lëndimin dhe është gati për sfidat e radhës.
Ylli francez është rikthyer në fushë në ndeshjet e fundit, fillimisht ndaj Manchester City dhe më pas në derbin ndaj Atlético Madrid, duke treguar se gjendja e tij fizike është në nivelin e duhur.
Në një deklaratë për media, Mbappé ka hedhur poshtë spekulimet që qarkullonin lidhur me trajtimin e tij, duke mohuar çdo pretendim për mosbesim ndaj stafit mjekësor.
“Gjuri im është mirë. Ka pasur shumë spekulime dhe janë thënë gjëra të pavërteta. Jam 100% i shëruar”, u shpreh ai.
Sulmuesi shtoi se diagnoza e marrë gjatë qëndrimit në Paris ka qenë e saktë dhe e ka ndihmuar në rikuperimin e plotë.
Tashmë, Mbappé do t’i bashkohet Francës për ndeshjet miqësore ndaj Brazilit dhe Kolumbisë, ku pritet të jetë një nga pikat kyçe të ekipit.
