Një operacion i gjerë i autoriteteve italiane ka çmontuar një rrjet të organizuar eskortash luksi në Milano, duke nxjerrë në pah edhe emra të njohur nga bota e futbollit. Sipas hetimeve të Guardia di Finanza, organizata vepronte nën maskën e një kompanie eventesh, duke ofruar shërbime ekskluzive për klientë të përzgjedhur në klubet dhe hotelet më të shtrenjta të qytetit.
Paketa “gjithëpërfshirëse” përfshinte dalje nate dhe shërbime në ambiente luksoze, për të cilat paguheshin shuma të mëdha, deri në mijëra euro. Hetimet zbuluan se aktiviteti gjeneronte fitime të konsiderueshme të paligjshme, të cilat tashmë janë sekuestruar nga autoritetet.
Prokuroria e Milanos ka çuar në arrestimin e katër personave të dyshuar si drejtues të rrjetit, ndërsa akuzat përfshijnë shfrytëzim prostitucioni, ndërmjetësim dhe pastrim parash. Sipas hetuesve, rrjeti kishte ndërtuar një sistem të mirëorganizuar rekrutimi, duke përfshirë si persona me eksperiencë, ashtu edhe vajza të reja të futura në këtë aktivitet përmes jetës së natës.
Ajo që e bën çështjen edhe më të rëndë është lista e klientëve. Dokumentet hetimore përmendin një numër të konsiderueshëm futbollistësh të Serisë A, kryesisht ata që jetojnë ose luajnë në zonën e Lombardisë, duke ngritur pikëpyetje serioze mbi përfshirjen e figurave publike në këtë skandal.
Hetimi ka evidentuar një qarkullim financiar që arrin në rreth 1.2 milionë euro, duke i dhënë një goditje të fortë një prej rrjeteve më të strukturuara të “argëtimit të luksit” në veri të Italisë.
