Autoritetet italiane kanë arrestuar një tifoz të Interit, i cili dyshohet se ka sulmuar me fishekzjarre portierin e Cremoneses, Emil Audero, gjatë një ndeshjeje zyrtare.
Sipas mediave dhe burimeve zyrtare në Itali, i arrestuari është një 19-vjeçar, i cili u identifikua përmes pamjeve të kamerave të sigurisë të instaluara në stadium. Arrestimi u krye disa ditë pas zhvillimit të ndeshjes, pas përfundimit të hetimeve të policisë.
Incidenti detyroi ndërprerjen e përkohshme të takimit, ndërsa Audero mori menjëherë ndihmën mjekësore në fushë. Për fat të mirë, portieri nuk ka pësuar dëmtime serioze dhe ishte jashtë rrezikut.
Pas kësaj ngjarjeje, autoritetet italiane vendosën masa të rrepta sigurie, përfshirë ndalimin e tifozëve të Interit për udhëtime në ndeshjet jashtë fushe për një periudhë të caktuar, si dhe forcimin e kontrolleve në stadiume.
Hetimet lidhur me incidentin pritet të vazhdojnë, ndërsa autoritetet kanë paralajmëruar tolerancë zero ndaj dhunës në sport.
