Legjenda e futbollit botëror dhe ish-trajneri i Manchester United, Sir Alex Ferguson, është shfaqur për herë të parë në publik pas problemeve shëndetësore që e detyruan të shtrohej në spital gjatë muajit maj.
84-vjeçari nuk ishte parë që nga incidenti i ndodhur para ndeshjes mes Manchester United dhe Liverpoolit në “Old Trafford”, kur u transportua me ambulancë drejt spitalit. Mungesa e tij edhe në ceremoninë e LMA Awards kishte shtuar shqetësimet për gjendjen shëndetësore të trajnerit legjendar.
Megjithatë, Ferguson është fotografuar së fundmi në një restorant në Wilmslow të Manchesterit, ku është shfaqur në humor të mirë dhe në gjendje të kënaqshme shëndetësore.
Fotografia u publikua nga një tifoz, i cili ndau emocionet e takimit me njeriun që konsiderohet arkitekti i epokës më të suksesshme në historinë e Manchester United dhe një nga figurat më të rëndësishme në karrierën e Cristiano Ronaldo.
Pamjet kanë ngjallur reagime pozitive te tifozët, të cilët janë shprehur të lumtur që Ferguson duket në formë të mirë pas shqetësimeve të fundit.
Për shumë adhurues të futbollit, rikthimi i Sir Alex Ferguson në publik është një lajm i mirëpritur, pasi ai mbetet një nga trajnerët më të suksesshëm dhe më të respektuar në historinë e sportit.
