Rasti i Gianluca Prestiannit ka marrë vëmendje të madhe në arenën evropiane, pasi lojtari i Benfica po hetohet nga UEFA për sjellje të dyshuar raciste ndaj yllit të Real Madrid, Vinícius Júnior.
Incidenti thuhet se ka ndodhur gjatë pjesës së dytë të ndeshjes së parë të “play-offit” të UEFA Champions League mes dy skuadrave javën e kaluar. Vinícius raportoi sulmuesin argjentinas te arbitri për komente të pretenduara raciste, ndërsa braziliani ishte autor i golit të vetëm të takimit në minutën e 50-të.
Sipas raportimeve, gjatë përgatitjes për rifillimin e lojës, Prestianni iu afrua Viníciusit dhe i tha disa fjalë me fanellën që i mbulonte gojën. Futbollisti i Benficës i ka mohuar kategorikisht akuzat.
UEFA ka reaguar menjëherë duke hapur hetim zyrtar dhe duke e pezulluar përkohësisht lojtarin deri në përfundim të procedurave disiplinore. Në deklaratën zyrtare thuhet se, pas raportit të ndërmjetëm të Inspektorit të Etikës dhe Disiplinës, Organi Kontrollues, i Etikës dhe Disiplinës (CEDB) ka vendosur pezullimin e përkohshëm për ndeshjen e radhës ku lojtari do të ishte i kualifikuar.
Vendimi përfundimtar do të merret vetëm pas mbylljes së hetimit dhe shqyrtimit të plotë të çështjes.
Nëse shpallet fajtor për shkelje të Nenit 14 të Rregullores Disiplinore të UEFA-s, që lidhet me sjellje diskriminuese, dënimi minimal mund të jetë shumë i ashpër.
Sipas dokumentit “European Football Against Racism”, të publikuar nga UEFA në vitin 2013, çdo lojtar që shpallet fajtor për sjellje raciste duhet të suspendohet për të paktën 10 ndeshje, ose për një periudhë të konsiderueshme kohore në rastin e zyrtarëve të klubit.
Një qasje e ngjashme aplikohet edhe në kampionatet e tjera evropiane. Për shembull, federata angleze ka rekomanduar në të kaluarën ndalime nga gjashtë deri në 12 ndeshje për akte diskriminimi nga individë të përfshirë në lojë.
Deri në një vendim përfundimtar, Prestianni do të mungojë në ndeshjen e kthimit të “play-offit” të Ligës së Kampionëve ndaj Real Madridit, e planifikuar për 25 shkurt.
Çështja mbetet e hapur dhe vendimi i UEFA-s pritet me interes të madh, pasi mund të vendosë një precedent të fortë në luftën kundër racizmit në futbollin evropian.
