Baseli ka regjistruar një fitore të madhe me përmbysje ndaj Zurichut, duke triumfuar në shtëpi në kuadër të xhiros së 23-të të elitës së futbollit zviceran. Miqtë nga Zurichu ishin shumë pranë tre pikëve, pasi deri në minutat e fundit të takimit mbanin epërsinë minimale 0-1.
Megjithatë, Baseli reagoi fuqishëm në fundin dramatik të ndeshjes, duke realizuar dy gola në minutat shtesë dhe duke kompletuar rikthimin e madh. Protagonist kryesor ishte kapiteni Xherdan Shaqiri, i cili u tregua i saktë nga pika e bardhë në minutën e 90-të, duke barazuar rezultatin dhe rikthyer shpresat për vendasit.
Ky ishte një tjetër gol i rëndësishëm për yllin shqiptar, që vazhdon të ketë ndikim vendimtar te Baseli. Kur dukej se ndeshja do të mbyllej në barazim, në minutën e 90+6’, Salah shënoi golin e fitores pas asistimit të Bacanin, duke shpërthyer festën në stadium dhe duke i siguruar Baselit tri pikë shumë të rëndësishme.
Me këtë fitore, Baseli vazhdon garën në kampionat, ndërsa Shaqiri konfirmon edhe një herë rolin e tij kyç në momentet vendimtare të sezonit.
