Gjiganti i La Ligës, Real Madridi, po bën gati një ofertë fillestare për të siguruar shërbimet e mesfushorit të Newcastle United, Sandro Tonali. Sipas raportimeve nga mediat spanjolle, reprezentuesi italian është futur në listën e dëshirave të “Los Blancos” për afatin kalimtar veror, teksa klubi nga Santiago Bernabéu po planifikon me kujdes përforcimet për sezonin 2025/26.
Reali ka hasur vështirësi në repartin e mesfushës gjatë këtij sezoni, për shkak të mungesës së stabilitetit dhe përshtatjes së plotë mes opsioneve aktuale. Për këtë arsye, drejtuesit e klubit kanë vendosur që gjatë verës të ndërhyjnë fuqishëm në treg, me synimin për të ndërtuar një mesfushë më të balancuar dhe konkurruese.
Në listën e hartuar me alternativa nga kampionatet më të forta të Evropës, emri i Sandro Tonalit spikat si një objektiv prioritar. Sipas raportit të publikuar nga “Fichajes”, në Valdebebas besohet se profili i Tonalit përputhet në mënyrë ideale me projektin e ri të rindërtimit të mesfushës, një repart kyç për të ardhmen e ekipit.
Po ashtu, thuhet se Real Madridi po përgatit një ofertë fillestare që tejkalon shifrën e 75 milionë eurove, me shpresën për të bindur Newcastle United të hapë negociatat për transferimin e mesfushorit italian.
