Përfaqësuesja e Kosovës do të zbresë sonte në fushë për ndeshjen miqësore ndaj Andorrës, e cila do të zhvillohet në stadiumin “Fadil Vokrri” në Prishtinë, me fillim nga ora 20:00.
Dardanët e presin këtë sfidë pas përfundimit të përgatitjeve, ndërsa të shtunën kanë zhvilluar edhe seancën e fundit stërvitore para ndeshjes.
Përzgjedhësi Franco Foda, së bashku me stafin teknik, është fokusuar në aspektet taktike dhe organizimin e lojës, me synimin që ekipi të paraqitet sa më mirë para tifozëve vendas.
Atmosfera në kampin e Kosovës raportohet të jetë pozitive, me futbollistët që janë të gatshëm për një tjetër test të rëndësishëm në kuadër të përgatitjeve për sfidat e ardhshme.
Kosova vjen në këtë takim pas ndeshjes miqësore të zhvilluar në Pragë ndaj Çekisë, ku u mposht me rezultat 2:1. Përballja me Andorrën shihet si një mundësi e mirë për reagim dhe rikthim te rezultatet pozitive para publikut dardan.
