Përfaqësuesja e Kosovës në futboll për femra ka pësuar humbje 1:0 ndaj Kroacisë në stadiumin “Fadil Vokrri”, në kuadër të Grupit C2 të kualifikimeve evropiane për Kupën e Botës 2027.
Golin e vetëm të ndeshjes e realizoi Karla Kurkutoviq në minutën e 15-të, duke shënuar direkt nga goditja e këndit dhe duke mposhtur portieren Djellza Mehmeti.
Pas kësaj disfate, Kosova zbret në vendin e dytë të grupit me 12 pikë, po aq sa Kroacia që kryeson falë goldallimit më të mirë.
Megjithatë, Dardanet vazhdojnë të mbeten në garë serioze për kualifikim. Të martën ato do të përballen në udhëtim me Gjibraltarin, në një sfidë ku konsiderohen favorite për të marrë tri pikët dhe për të siguruar një vend në fazën e plejofit.
Vendi i parë në grup siguron kualifikim direkt në plejofin e Botërorit 2027, ndërsa në fazën tjetër avancojnë edhe dy kombëtaret më të mira që e mbyllin garën në vendin e dytë. Në këtë aspekt, Kosova mbetet në pozitë të favorshme.
Përfaqësuesja e Kosovës mund të synojë ende edhe kreun e grupit. Kroacia në ndeshjen e fundit përballet me Bullgarinë, ndërsa aktualisht ka epërsi prej dy golash në goldallim ndaj Dardaneve.
