Michel Platini ka denoncuar presidentin e FIFA-s, Gianni Infantino, duke e akuzuar për komplot dhe duke paralajmëruar një padi civile për dëmshpërblim ndaj FIFA-s.
Sipas përfaqësuesve ligjorë të Platinit, në Paris është dorëzuar një denoncim penal kundër Infantinos dhe pesë funksionarëve zviceranë të futbollit dhe prokurorisë.
Legjenda e futbollit francez pretendon se ndaj tij janë organizuar akuza të rreme dhe është ushtruar ndikim i paligjshëm për t’ia pamundësuar marrjen e presidencës së FIFA-s në vitin 2015.
Platini konsiderohej favorit për të pasuar Sepp Blatter në krye të FIFA-s, por karriera e tij si drejtues u ndërpre pas përfshirjes në një skandal financiar që çoi në pezullimin e tij nga futbolli.
Megjithatë, ai u shpall i pafajshëm vitin e kaluar pas një procesi të dytë gjyqësor në Zvicër.
Përveç denoncimit penal, avokatët e Platinit do të nisin edhe një procedurë civile për të kërkuar dëmshpërblim nga FIFA.
Denoncimet e reja vijnë vetëm pak ditë para nisjes së Kupës së Botës 2026 në Amerikën e Veriut, turne që zhvillohet nën drejtimin e Infantinos, i cili u zgjodh president i FIFA-s në vitin 2016 pas largimit të Blatterit.
