Pep Guardiola ka refuzuar një ofertë të rëndësishme nga Inter Miami, pavarësisht interesimit të madh të David Beckhamit për ta sjellë në pankinën e klubit amerikan.
Sipas raportimeve të mediave britanike, Beckham e kishte identifikuar trajnerin spanjoll si kandidatin ideal për të zëvendësuar Javier Mascheranon, me synimin për ta ribashkuar me Lionel Messin pas periudhës së suksesshme që të dy kaluan te Barcelona.
Megjithatë, Guardiola i ka dhënë një përgjigje negative klubit nga Florida, duke lënë të kuptohet se nuk dëshiron të nisë një kapitull të ri në futbollin amerikan.
Sipas burimeve pranë trajnerit, 55-vjeçari është gjithnjë e më i vendosur të marrë një vit pushim pas angazhimeve të gjata dhe intensive në futbollin elitar evropian.
Refuzimi i Guardiolës përbën një goditje për planet e Inter Miamit, i cili shpresonte të sillte në MLS një nga trajnerët më të suksesshëm të historisë moderne të futbollit.
Për momentin, ribashkimi i shumëpërfolur mes Guardiolës dhe Messit në Shtetet e Bashkuara mbetet vetëm një ide, ndërsa klubi amerikan do të duhet të kërkojë alternativa të tjera për stolin e tij.
