Rigjykimi për vdekjen e legjendës së futbollit, Diego Armando Maradona, ka sjellë deklarata tronditëse nga ekspertët mjekësorë në Argjentinë.
Sipas ish-mjekut të tij, Dr. Mario Schiter, Maradona mund të kishte mbijetuar me një trajtim shumë të thjeshtë. Ai deklaroi se një diuretik bazik do të kishte përmirësuar gjendjen shëndetësore të ikonës argjentinase “brenda 48 orëve”.
Maradona ndërroi jetë në vitin 2020, në moshën 60-vjeçare, vetëm pak javë pasi ishte operuar për heqjen e një mpiksjeje gjaku në tru. Shkaku zyrtar i vdekjes ishte infarkti në zemër.
Gjatë procesit gjyqësor, shtatë pjesëtarë të stafit mjekësor po përballen me akuza për neglizhencë dhe braktisje të pacientit. Një tjetër ekspert deklaroi se Maradona kishte grumbullim të madh lëngjesh në disa organe në momentin e vdekjes.
Kardiologu Oscar Franco dëshmoi se kishte rekomanduar teste më të detajuara për të përjashtuar sëmundje të arterieve koronare, por sipas tij, mjeku kryesor Leopoldo Luque kishte refuzuar kryerjen e ekzaminimeve shtesë.
Rigjykimi po zhvillohet në San Isidro, pranë Buenos Airesit, ndërsa rreth 100 dëshmitarë pritet të japin deklarime për rastin që vazhdon të tronditë opinionin publik në Argjentinë dhe botën e futbollit.
Procesi ka nxjerrë në pah pretendime të rënda për mënyrën e trajtimit të Maradonës në ditët e fundit të jetës së tij, duke e kthyer çështjen në një nga rastet më tëdiskutuara në sportin botëror.
