Derbi Tirana – Dinamo pritet të jetë një nga ndeshjet më tërheqëse të javës në Superiore. Supersfida e ditës së shtunë do të zhvillohet në stadiumin “Selman Stërmasi”, me fillim nga ora 13:30, dhe ka ngjallur interes të madh te tifozët e të dyja skuadrave.
Përballja vlerësohet si mjaft e rëndësishme për të dy ekipet, të cilat do të zbresin në fushë me objektivin e vetëm: fitoren. Përtej rivalitetit tradicional mes klubeve, kjo ndeshje sjell edhe një duel interesant në pankinë, atë mes Ardian Nuhiut dhe Ilir Dajës.
Në aspektin statistikor, Ilir Daja hyn në këtë sfidë me avantazh. Trajneri i Dinamos ka treguar se di të menaxhojë më mirë përballjet direkte ndaj Nuhiut, pasi në gjashtë ndeshje të mëparshme mes tyre ka regjistruar tre fitore, kundrejt një fitoreje të teknikut të Tiranës, ndërsa dy takime janë mbyllur në barazim.
Këto shifra e vendosin Dajën si më të favorizuar në prag të derbit, megjithatë fusha mbetet vendimtare. Mbetet për t’u parë nëse Ardian Nuhiu do të arrijë të përmbysë bilancin historik apo nëse Ilir Daja do të konfirmojë epërsinë e tij edhe në këtë përballje të radhës.
