Sulmuesi anglez Harry Kane po kalon një nga sezonet më të mira të karrierës së tij, duke u shndërruar në një kandidat serioz për fitimin e “Topit të Artë”, falë paraqitjeve të jashtëzakonshme me Bayern Munich.
Pas një dekade te Tottenham Hotspur pa trofe madhorë, Kane vendosi të ndryshojë ambient dhe kalimi në Gjermani rezultoi vendimtar. Me Bayernin, ai fitoi menjëherë trofetë e parë, fillimisht Superkupën e Gjermanisë dhe më pas titullin në Bundesliga, duke thyer kështu “mallkimin” që e kishte ndjekur në Angli.
Sezoni aktual ka qenë spektakolar për kapitenin e Anglisë, i cili ka realizuar plot 51 gola në të gjitha garat, duke udhëhequr Bayernin drejt një tjetër titulli kampion. Forma e tij e lartë ka bërë që drejtuesit e klubit të jenë më se të kënaqur, me presidentin e nderit që ka konfirmuar besimin e plotë te sulmuesi anglez.
Edhe vetë Kane ka shprehur lumturinë për jetën dhe karrierën në Mynih, duke theksuar se ambicia e tij nuk ndalet vetëm me titujt e fituar deri tani, por synon një mbyllje perfekte të sezonit në të gjitha garat, përfshirë edhe Ligën e Kampionëve.
Me Botërorin në horizont dhe me një sezon të tillë dominues, Harry Kane po shihet gjithnjë e më shumë si favoriti kryesor për “Topin e Artë” – një çmim që do të kurorëzonte një karrierë të mbushur me gola, sakrifica dhe rikthim të madh në majat e futbollit botëror.
