Turqia do të rikthehet në kalendarin e Formula 1 duke filluar nga viti 2027, me organizimin e Çmimit të Madh të Stambollit, një lajm që është pritur me entuziazëm nga tifozët e motorsportit.
Njoftimi u bë gjatë një eventi zyrtar në Stamboll, ku presidenti Recep Tayyip Erdoğan e cilësoi rikthimin si një arritje të rëndësishme për vendin. Sipas tij, organizimi i garës për të paktën pesë vite radhazi do të forcojë pozicionin e Turqisë në skenën ndërkombëtare dhe do të dëshmojë kapacitetin e saj për të organizuar evente të mëdha sportive.
Garat do të zhvillohen në Istanbul Park, një cirkuit i njohur për sfidat teknike dhe për “kthesën 8”, që konsiderohet një nga segmentet më të vështira për pilotët. Ky pistë ka pritur më herët gara të Formula 1 nga viti 2005 deri në 2011, si dhe rikthime të përkohshme në vitet 2020 dhe 2021.
Në ceremoninë e prezantimit morën pjesë edhe drejtues të lartë të motorsportit, përfshirë Stefano Domenicali, administrator i Formula 1, dhe Mohammed Ben Sulayem, president i Federatës Ndërkombëtare të Automobilizmit.
Rikthimi i Turqisë në kalendar vjen në një kohë kur Formula 1 po përjeton një rritje të jashtëzakonshme globale. Vetëm në sezonin 2025, ky sport ka arritur mbi 827 milionë telespektatorë në më shumë se 180 vende, ndërsa numri i ndjekësve në rrjetet sociale ka kaluar shifrën e 2.3 miliardë.
Gjithashtu, mbi 6.7 milionë tifozë kanë qenë të pranishëm në tribunat e cirkuiteve gjatë sezonit të fundit, duke e konfirmuar Formula 1 si një nga sportet më të ndjekura dhe më tërheqëse në botë. Rikthimi i Stambollit pritet të shtojë edhe më shumë interesin dhe spektaklin në vitet në vijim.
