Boksierja kosovare Donjeta Sadiku ka siguruar një tjetër sukses të madh në arenën ndërkombëtare, duke u kualifikuar në finalen e turneut prestigjioz të boksit amator Strandja Tournament, që po zhvillohet në Sofia.
Në gjysmëfinale, Sadiku shfaqi formë të jashtëzakonshme, duke dominuar përballjen ndaj egjiptianes Ayyad Yomna. Pas tre raundesh të forta dhe me kontroll të plotë të meçit, ajo arriti fitore bindëse për të prerë biletën drejt finales në kategorinë deri në 60 kilogramë.
Tashmë, Sadiku është vetëm një hap larg medaljes së artë, me synimin për ta kurorëzuar paraqitjen e saj të shkëlqyer në këtë turne me trofeun më të çmuar.
