FIFA ka bërë të ditur detaje të reja lidhur me fondin e çmimeve për Kupën e Botës 2026, duke konfirmuar një rritje të ndjeshme financiare krahasuar me edicionet e mëparshme. Fituesi i turneut do të përfitojë 50 milionë dollarë amerikanë, ndërsa fondi total i çmimeve do të arrijë në 655 milionë dollarë, shifra më e lartë në historinë e kësaj gare.
Kupa e Botës 2026 do të zhvillohet në Shtetet e Bashkuara të Amerikës, Kanada dhe Meksikë, nga 11 qershori deri më 19 korrik, dhe përfaqëson edicionin e parë me 48 përfaqësuese kombëtare, çka ka ndikuar drejtpërdrejt në rritjen e të ardhurave dhe shpërblimeve.
Sipas raportimeve të mediave ndërkombëtare, fondi i çmimeve për Botërorin 2026 është rreth 48.9 për qind më i lartë se ai i edicionit të vitit 2022 në Katar. Për krahasim, Argjentina si kampione e botës në vitin 2022 kishte përfituar 42 milionë dollarë, ndërsa Franca, fituese në vitin 2018, kishte marrë 38 milionë dollarë.
Në të njëjtën kohë, diferenca mes shpërblimeve për futbollin e meshkujve dhe atij të femrave mbetet e konsiderueshme. Kupa e Botës për Femra 2023, e zhvilluar në Australi dhe Zelandën e Re, kishte një fond total çmimesh prej 110 milionë dollarësh, shumëfish më i ulët krahasuar me turneun e ardhshëm të meshkujve.
Presidenti i FIFA-s, Gianni Infantino, ka theksuar më herët se barazia gjinore mbetet një nga objektivat kryesore të organizatës, duke shprehur synimin që në të ardhmen të arrihet një balancim më i madh mes shpërblimeve për dy garat kryesore. Turneu i ardhshëm i Kupës së Botës për Femra është planifikuar për vitin 2027 në Brazil, ku pritet të vërehen hapa të rinj në këtë drejtim.
