Gianni Infantino ka uruar Federatën e Futbollit të Kosovës me rastin e 10-vjetorit të anëtarësimit në FIFA, duke vlerësuar progresin e futbollit kosovar gjatë dekadës së fundit.
Përmes një postimi në rrjetet sociale, presidenti i FIFA-s theksoi se futbolli në Kosovë ka vazhduar të rritet dhe të frymëzojë brezat e rinj dhe tifozët në vend.
“Përgëzime Federatës së Futbollit të Kosovës për kremtimin e 10 viteve si federatë anëtare e FIFA-s. Gjatë dekadës së kaluar, futbolli në Kosovë ka vazhduar të rritet dhe të frymëzojë shumë lojtarë të rinj dhe tifozë”, shkroi Infantino.
Kreu i FIFA-s riafirmoi gjithashtu përkushtimin e institucionit që drejton për të mbështetur zhvillimin e futbollit në Kosovë. Në mesazhin e tij, ai përmendi kontributin e ish-presidentit të ndjerë të FFK-së, Fadil Vokrri, si dhe punën e presidentit aktual, Agim Ademi.
“FIFA mbetet e përkushtuar në mbështetjen e zhvillimit të lojës në Kosovë”, thuhet në mesazhin e Infantinos, i cili e cilësoi dekadën e fundit si një periudhë me progres të rëndësishëm për futbollin kosovar.
