Përzgjedhësi i Kosovës Franco Foda, ka dalë para mediave në prag të përballjes së rëndësishme ndaj Sllovakisë, duke dhënë sinjale të qarta për ambiciet e skuadrës së tij.
Tekniku gjerman vlerësoi lart kundërshtarin, duke theksuar se Sllovakia është një ekip i organizuar dhe i rrezikshëm, sidomos në kundërsulm. Megjithatë, ai beson se Kosova ka treguar potencialin e saj dhe është e gatshme të përballet në nivel të lartë, edhe në transfertë.
“Sllovakia është një skuadër shumë e fortë dhe e njohim mirë stilin e tyre. Janë të rrezikshëm në kundërsulme, por edhe ne kemi dëshmuar se dimë të luajmë mirë si mysafirë”, theksoi Foda.
Trajneri i “Dardanëve” zbuloi se ekipi ka në dispozicion disa ditë përgatitjeje intensive, ku fokusi do të jetë kryesisht në aspektin taktik, duke pasur parasysh gjendjen e mirë fizike të futbollistëve.
“Lojtarët janë në formë shumë të mirë falë angazhimeve me klubet e tyre. Tani është momenti të punojmë në detajet taktike dhe t’u japim atyre një plan të qartë për ndeshjen”, shtoi ai.
Në fund, Foda nuk e fshehu objektivin madhor: që Kosova të sigurojë një vend në finale dhe atë ta zhvillojë para tifozëve të saj në Fadil Vokrri Stadium.
“Dëshira jonë është që finalen ta luajmë në shtëpi dhe do të bëjmë gjithçka për ta arritur këtë”, përfundoi ai.
