Talenti me origjinë shqiptare, Brajan Gruda, i ka dhënë fund spekulimeve rreth të ardhmes së tij në nivel ndërkombëtar, duke konfirmuar qartë zgjedhjen për Gjermaninë.
Sulmuesi 21-vjeçar ishte përfolur ditët e fundit si një mundësi për Shqipërinë ose Kosovën, për shkak të konkurrencës së madhe te përfaqësuesja gjermane.
Megjithatë, një postim i tij në rrjetet sociale ka sqaruar gjithçka. “Gjithmonë krenar që luaj për Gjermaninë. Një pengesë e vogël, por i kënaqur me rezultatet. Kthehem së shpejti”, ka shkruar Gruda në “Instagram”.
Ky reagim konsiderohet si një sinjal i fortë se lojtari nuk po mendon ndonjë ndryshim të përfaqësueses, duke i dhënë përparësi vazhdimësisë me “Pancerat”.
Aktualisht, Gruda është pjesë e Gjermanisë U-21 dhe synon të marrë ftesën nga trajneri Julian Nagelsmann për ekipin e parë në të ardhmen e afërt.
