Pep Guardiola ka bërë thirrje për respekt ndaj lojtarëve myslimanë pas reagimeve të një pjese të tifozëve në fitoren minimale të Manchester City ndaj Leeds United.
City triumfoi 1-0 në transfertë, me golin vendimtar të shënuar nga Antoine Semenyo pas asistimit të Rayan Aït-Nouri, duke siguruar tri pikë të vlefshme në garën për titull.
Një nga momentet më të diskutuara të takimit ndodhi në minutën e 13-të, kur gjyqtari Peter Bankes ndaloi përkohësisht lojën për t’u dhënë mundësi futbollistëve myslimanë të prishnin agjërimin gjatë muajit të Ramazanit. Vendimi u shoqërua me fishkëllima nga një pjesë e tifozëve vendas.
Pas ndeshjes, Guardiola reagoi qartë: “Respektoni fetë, respektoni diversitetin – kjo është thelbësore. Premier League lejon një ose dy minuta për lojtarët që agjërojnë,” deklaroi ai.
Në mesin e futbollistëve që po agjërojnë janë Aït-Nouri, Omar Marmoush, Rayan Cherki dhe Abdukodir Khusanov.
Pavarësisht polemikave, skuadra e Guardiolës doli me fitore nga “Elland Road”, duke mbajtur të hapura ambiciet për titull në fazën përfundimtare të sezonit.
