Jasir Asani ka sqaruar përfundimisht zërat që e lidhnin me një largim të mundshëm nga Esteghlal, duke konfirmuar se do të vazhdojë të jetë pjesë e skuadrës iraniane.
Sulmuesi i Kombëtares shqiptare ka reaguar përmes një postimi në rrjetet sociale, ku ka bërë të qartë qëndrimin e tij dhe ka qetësuar tifozët e klubit. “Asani ka theksuar se ka zhvilluar bisedime me trajnerin dhe se të dy palët janë të vendosura të vazhdojnë bashkëpunimin, me synimin për të luftuar deri në fund për objektivat e përbashkëta të ekipit.
Ai ka mohuar kategorikisht mundësinë e transferimit në një klub tjetër, duke nënvizuar se fokusi i tij mbetet vetëm te Esteghlal.” Në mesazhin e drejtuar tifozëve, ish-lojtari i Partizanit ka shprehur mirënjohje për mbështetjen dhe pasionin e treguar që nga dita e parë, duke theksuar se kjo ka qenë arsyeja kryesore që e shtyu të zgjidhte klubin iranian.
Ai gjithashtu u ka bërë thirrje tifozëve të vazhdojnë ta mbështesin ekipin, lojtarët dhe stafin teknik në rrugëtimin drejt sukseseve të ardhshme. Jasir Asani iu bashkua Esteghlalit në gusht të vitit 2025 dhe që nga ajo kohë ka qenë një nga lojtarët më të rëndësishëm të skuadrës.
Në 24 paraqitje, ai ka realizuar 11 gola dhe ka kontribuar me 3 asistime, duke u shndërruar në një prej elementeve kyçe të repartit ofensiv. Me këtë deklaratë, Asani i ka dhënë fund çdo spekulimi, duke konfirmuar se e ardhmja e tij është e lidhur ngushtë me Esteghlalin dhe objektivat e klubit.
