Kombëtarja e Shqipërisë ka nisur zyrtarisht përgatitjet për dy ndeshjet miqësore të muajit qershor, ndaj Izraelit dhe Luksemburgut.
Kuqezinjtë zhvilluan seancën e parë stërvitore në ambientet e “Shtëpisë së Futbollit”, e cila ishte njëkohësisht edhe stërvitja e parë nën drejtimin e stafit të ri teknik, me trajnerin Rolando Maran në krye.
Në këtë seancë mori pjesë pothuajse i gjithë grupi i futbollistëve, me përjashtim të Naser Alijit, i cili zhvilloi fazë rikuperimi pas ndeshjes së së dielës me Dinamon. Ndërkohë, Ardian Ismajli është larguar më herët nga grumbullimi për shkak të problemeve fizike.
Futbollistët e nisën punën fillimisht në palestër, ndërsa më pas zbritën në fushë për ushtrime taktike dhe përgatitje specifike për dy ndeshjet e radhës.
Pasditen e së martës, Kombëtarja e Shqipërisë do të zhvillojë seancën e fundit zyrtare stërvitore në “Air Albania Stadium”, nga ora 17:00. Para stërvitjes do të mbahet edhe konferenca për media e trajnerit Rolando Maran dhe njërit prej futbollistëve.
Ndeshja miqësore ndaj Izraelit do të zhvillohet të mërkurën, më 3 qershor, në “Air Albania Stadium”, me fillim nga ora 20:00.
