Përfaqësuesja e Kosovës është rikthyer në stërvitje pas ndeshjes miqësore ndaj Çekisë, të zhvilluar në Pragë.
Skuadra dardane ka vazhduar përgatitjet për sfidën e radhës miqësore kundër Andorrës, ndërsa seanca e sotme është zhvilluar në stadiumin “Fadil Vokrri” në Prishtinë.
Sipas Federatës së Futbollit të Kosovës, në stërvitje morën pjesë 11 futbollistë, ndërsa pjesa tjetër e ekipit zhvilloi program rigjenerues në hotel, pas angazhimit në ndeshjen ndaj Çekisë.
“Puna vazhdon me fokus maksimal drejt miqësores së dytë”, ka shkruar Federata e Futbollit e Kosovës.
Kosova do të synojë të shfrytëzojë këtë ndeshje për të testuar formën e lojtarëve dhe për të vazhduar përgatitjet në prag të sfidave të ardhshme.
