Legjenda e Real Madridit, Toni Kroos, ka reaguar ndaj disa citateve që iu atribuuan ish-mesfushorit nigerian John Obi Mikel, pavarësisht se ky i fundit i kishte mohuar më herët si deklarata të rreme.
Kroos dhe Mikel, tashmë të dy të pensionuar, janë figura të njohura në botën e futbollit dhe shpesh janë aktivë në media pas përfundimit të karrierës. Megjithatë, këtë herë reagimi i gjermanit erdhi pas rishfaqjes në rrjetet sociale të disa citateve që pretendohej se Mikel i kishte thënë për të.
Në deklaratat e atribuuara, Mikel thuhej se e kishte quajtur Kroosin “një mesfushor mesatar”, duke shtuar se suksesi i tij lidhej kryesisht me faktin se kishte luajtur për një klub historik si Real Madridi. Në këto citate, ish-lojtari i Chelseat shprehej se trofetë mund të jenë mashtruese dhe se kishte lojtarë të tjerë më të mirë në të njëjtat pozicione.
Megjithatë, John Obi Mikel i ka mohuar publikisht këto deklarata që kur ato u bënë virale vitin e kaluar, duke i cilësuar si “lajme të rreme”. Pavarësisht kësaj, citatet janë rishfaqur së fundmi dhe kanë marrë jehonë edhe në mediat spanjolle.
Pasi pa një nga postimet e përkthyera në spanjisht, Toni Kroos reagoi shkurt në rrjetet sociale, duke shkruar: “Atëherë pse nuk luajte për Real Madridin?”
Me këtë koment, Kroos la të kuptohet se të luash për një klub si Real Madridi nuk është rastësi, por pasojë e nivelit dhe cilësisë së lartë individuale.
Ndërkohë, mesfushori gjerman ka qenë aktiv edhe në tema të tjera së fundmi, duke komentuar konfliktin e vazhdueshëm mes Cristiano Ronaldos dhe drejtuesve të Al-Nassr, ku ka kritikuar Saudi Pro League për mungesë respekti ndaj yllit portugez.
