Kylian Mbappé po shihet gjerësisht si një nga favoritët kryesorë për ta fituar Topin e Artë në vitin 2026, pas shumë vitesh ku ka qenë pranë kulmit të lavdisë individuale në futbollin botëror.
Sulmuesi francez u bë figurë globale që në moshë të re, duke shkëlqyer me Francën në Kupën e Botës 2018, ndërsa në finalen e Botërorit 2022 realizoi një het-trik historik. Megjithatë, pavarësisht paraqitjes së jashtëzakonshme, ai mbeti i zhgënjyer pas humbjes ndaj Argjentinës së Lionel Messit.
Ish-reprezentuesi i Francës, Bacary Sagna, është i bindur se ky është momenti i duhur që Mbappé të shpërblehet me çmimin më prestigjioz individual në futboll.
“Ai do ta fitojë. Mendoj se ky është sezoni i duhur që ai ta fitojë Topin e Artë. Kupa e Botës do të jetë shumë e mirë për të me kombëtaren e Francës dhe besoj se ai do të ketë një ecuri shumë të fortë edhe në Ligën e Kampionëve me Real Madridin,” është shprehur Sagna.
Sipas tij, Mbappé ndodhet tashmë një hap përpara rivalëve të tij, falë formës dhe rolit udhëheqës që po ka në nivel klubesh dhe kombëtare.
“Ai është në avantazh sepse po luan shumë mirë dhe është në pozicionin e parë. Përveç nëse ka një Kupë Bote shumë të dobët, gjë që nuk e besoj, mendoj se ai do ta fitojë Topin e Artë,” shtoi ai.
Në të njëjtën linjë është shprehur edhe ish-futbollisti tjetër francez, Frank Leboeuf, i cili shpreson që ylli i Real Madridit të marrë më në fund vlerësimin që meriton.
“Unë vërtet dua që Mbappé ta fitojë Topin e Artë, sepse ai është një lojtar i jashtëzakonshëm,” ka deklaruar Leboeuf.
Mbappé vazhdon të jetë një nga figurat më të rëndësishme të futbollit modern, ndërsa viti 2026 konsiderohet nga shumë analistë si momenti ideal që ai të kurorëzojë karrierën e tij me çmimin individual më prestigjioz në botë.
