Kylian Mbappé po kalon një periudhë të jashtëzakonshme në karrierën e tij, duke konfirmuar statusin si një nga futbollistët më të mirë në botë. Sulmuesi francez i Real Madridit po shkëlqen me paraqitjet e tij, duke qenë një nga lojtarët kyç të klubit mbretëror këtë sezon.
Në 21 paraqitje në La Liga, Mbappé ka realizuar 21 gola dhe ka kontribuar edhe me katër asistime, shifra që dëshmojnë ndikimin e tij vendimtar në repartin ofensiv të madrilenëve.
Së fundmi, gazetari i njohur italian Fabrizio Romano ka publikuar një krahasim statistik interesant mes Mbappé dhe njërit prej sulmuesve më të mëdhenj në historinë e futbollit, legjendës braziliane Ronaldo Nazário.
Sipas të dhënave, Mbappé ka arritur tashmë në 415 gola të shënuar në karrierë, duke e kaluar Ronaldon, i cili e kishte mbyllur karrierën me 414 gola. Ky rekord merr edhe më shumë peshë duke pasur parasysh faktin se Mbappé është vetëm 27 vjeç dhe ka ende shumë vite në nivelin më të lartë të futbollit.
Me ritmin aktual dhe potencialin që posedon, pritet që sulmuesi francez ta përmirësojë edhe më tej bilancin e tij të golave në vitet e ardhshme, duke synuar rekorde edhe më të mëdha historike.
