Një moment shqetësues ndodhi në minutat e fundit të përballjes mes Napoli dhe Lecce, kur sulmuesi i krahut Lameck Banda u rrëzua papritur pranë vijës anësore, duke shkaktuar alarm në stadium.
Ndeshja e zhvilluar në Stadio Diego Armando Maradona përfundoi me fitoren 2-1 të vendasve. Lecce kishte kaluar fillimisht në epërsi me golin e Jamil Siebert, por skuadra napolitane përmbysi gjithçka falë realizimeve të Rasmus Højlund dhe Matteo Politano.
Megjithatë, fundi i ndeshjes u shënua nga një incident që shqetësoi lojtarët dhe tifozët. Trajneri i Napolit, Antonio Conte, ishte ndër të parët që vuri re se Banda po përjetonte vështirësi në frymëmarrje pranë vijës anësore dhe menjëherë sinjalizoi stafin mjekësor të Lecces për të ndërhyrë.
Stadiumi u përfshi nga një heshtje e madhe ndërsa mjekët hynë në fushë për t’i ofruar ndihmën e parë lojtarit. Pas disa minutash trajtimi, Banda u largua nga fusha me barelë dhe u dërgua drejt ambulancës për kontrolle të mëtejshme.
Sipas raportimeve të DAZN në Itali, sulmuesi kishte marrë një goditje në zonën e gjoksit rreth 40 sekonda para se të rrëzohej. Goditja i shkaktoi mungesë ajri dhe vështirësi në frymëmarrje, duke e detyruar të ndalonte menjëherë lojën.
Informacionet e para nga stafi mjekësor janë qetësuese: Banda nuk e humbi asnjëherë vetëdijen dhe gjendja e tij konsiderohet stabile, ndërsa pritet të kryejë kontrolle shtesë për siguri.
