Benfica ka marrë një vendim të rëndësishëm në favor, pasi gjykata e shkallës së parë ka rrëzuar akuzat ndaj klubit dhe ish-presidentit Luis Filipe Vieira në procesin e njohur si “Saco Azul”, duke mbyllur përkohësisht një çështje që zgjati rreth 10 vite.
Rasti kishte në fokus një skemë të dyshuar financiare, ku përmes kontratave të supozuara fiktive, të lidhura me një kompani private, pretendohej se ishin përfituar në mënyrë të paligjshme rreth 1.8 milionë euro nga fondet e klubit. Megjithatë, gjykata vlerësoi se provat nuk ishin të mjaftueshme për të vërtetuar fajësinë e të pandehurve.
Në vendimin e saj, trupi gjykues theksoi pamundësinë për të individualizuar përgjegjësinë penale, duke sjellë lirimin e të gjithë të përfshirëve në këtë proces të gjatë dhe kompleks.
Reagimet nga kampi i Benficës nuk munguan. Presidenti aktual, ish-futbollisti Rui Costa, e cilësoi këtë vendim si një lehtësim të madh për klubin, duke theksuar se drejtësia konfirmoi atë që ata kishin mbrojtur prej vitesh.
Nga ana tjetër, edhe Vieira u shfaq i kënaqur me vendimin, ndonëse situata e tij ligjore mbetet e hapur në një tjetër proces, i njohur si “Operacioni kartoni i kuq”, që lidhet me dyshime për transaksione financiare në tregun e transferimeve.
Megjithatë, çështja nuk është mbyllur përfundimisht. Prokuroria ka paralajmëruar apelim të vendimit, duke lënë të hapur mundësinë që rasti të rikthehet në shqyrtim në instanca më të larta. Kjo do të thotë se saga ligjore e Benficës mund të vazhdojë edhe për një kohë tjetër.
