Mesfushori i Kosovës, Elvis Rexhbeçaj, është prezantuar zyrtarisht nga VfL Wolfsburg, duke shënuar një rikthim të rëndësishëm në klubin ku hodhi hapat e parë në karrierë.
28-vjeçari ka nënshkruar kontratë të re që do ta mbajë të lidhur me “ujqit” deri më 30 qershor të vitit 2030. Ky transferim vjen pasi ai përfundoi sezonin me FC Augsburg, ku kaloi katër vitet e fundit.
Drejtori sportiv i Wolfsburgut, Pirmin Schwegler, vlerësoi lart cilësitë e mesfushorit kosovar, duke theksuar se ai nuk sjell vetëm aftësi në fushë, por edhe personalitet dhe lidership.
Rexhbeçaj është produkt i akademisë së Wolfsburgut, ku u bashkua në moshën 12-vjeçare dhe kaloi të gjitha hallkat e klubit, derisa debutoi në Bundesliga në vitin 2018. Rikthimi i tij konsiderohet si një kthim në rrënjë dhe një hap i rëndësishëm për vazhdimin e karrierës.
Vetë lojtari u shpreh i emocionuar për këtë rikthim, duke theksuar se Wolfsburgu ka një vend të veçantë në jetën e tij dhe se vendimi për t’u rikthyer ishte i natyrshëm sapo iu dha mundësia.
