Tottenhami po përjeton një nga sezonet më të vështira në vitet e fundit, me skuadrën e drejtuar nga Roberto De Zerbi që ndodhet në një situatë alarmante në tabelë.
Me vetëm pesë ndeshje të mbetura në Premier League, “gjelat” renditen në vendet e fundit me 31 pikë dhe pa asnjë fitore gjatë vitit 2026. Fitorja e fundit daton më 28 dhjetor ndaj Crystal Palace, një statistikë që pasqyron qartë krizën e thellë sportive.
Nëse kjo formë vazhdon, rënia nga elita e futbollit anglez mbetet një rrezik real për klubin londinez, që historikisht ka qenë pjesë e Premier League.
Në përpjekje për të ndryshuar situatën, Tottenhami po kërkon zgjidhje të reja edhe jashtë fushës. Së fundmi, klubi ka publikuar një njoftim pune në LinkedIn për të punësuar një psikolog për ekipin e parë, me synimin për të përmirësuar gjendjen mendore dhe performancën e lojtarëve.
Drejtuesit e klubit shpresojnë që kjo lëvizje të ndikojë pozitivisht në reagimin e skuadrës në javët e fundit të sezonit dhe të shmangë një nga skenarët më të errët në historinë e klubit.
