Futbollistët shqiptarë po vazhdojnë të lënë gjurmë në elitën e futbollit zviceran, teksa tre prej tyre janë përfshirë në formacionin ideal të javës në Superligën e Zvicrës.
Në kuadër të xhiros së 33-të, shkëlqyen tre lojtarë shqiptarë – dy nga Kosova dhe një nga Maqedonia e Veriut – duke konfirmuar formën e tyre të mirë në këtë fazë të sezonit.
Faqja e specializuar për statistika dhe vlerësime, Sofascore, ka përzgjedhur në formacionin e javës portierin Amir Shaipi, mbrojtësin Adrian Bajrami dhe mesfushorin Benjamin Kololli.
Portieri i Luganos, Shaipi, ishte vendimtar në fitoren minimale 1:0 në udhëtim ndaj Zurichut, duke u vlerësuar me notën e lartë 8.0 për paraqitjen e tij.
Ndërkohë, Bajrami zhvilloi një ndeshje solide me Luzernin në barazimin 2:2 ndaj St. Gallenit, për çka u vlerësua me notën 7.6.
Në anën tjetër, Kololli kontribuoi me një paraqitje mbresëlënëse në mesfushë për Sionin, në fitoren bindëse 3:0 ndaj Lausannes, duke marrë notën 7.7.
Përfshirja e tre futbollistëve shqiptarë në formacionin më të mirë të javës është një tjetër dëshmi e ndikimit të tyre në kampionatin zviceran dhe e rritjes së vazhdueshme të nivelit të tyre në arenën ndërkombëtare.
