TSG Hoffenheim po vazhdon të shkruajë një histori të pazakontë në futbollin gjerman, ndërsa këtë sezon është shumë pranë një tjetër kualifikimi historik në UEFA Champions League.
Klubi nga një fshat i vogël në Gjermani nuk konsiderohet ndër emrat tradicionalë të futbollit gjerman, por ngritja e tij ka qenë e jashtëzakonshme. Në fillim të viteve 2000, Hoffenheim garonte në kategorinë e pestë, ndërsa në vitin 2008 siguroi për herë të parë promovimin në Bundesliga, ku vazhdon të jetë pjesë edhe sot.
Në arenën evropiane, klubi debutoi në sezonin 2017/18, ndërsa paraqitjen e vetme në fazën e grupeve të Ligës së Kampionëve e kishte në edicionin 2018/19. Gjithashtu, ka luajtur edhe në UEFA Europa League gjatë sezoneve 2020/21 dhe 2024/25.
Tashmë, për herë të pestë në histori, Hoffenheim ka siguruar pjesëmarrjen në garat evropiane për sezonin 2026/27 dhe synimi i madh mbetet rikthimi në Ligën e Kampionëve.
Vëmendje të veçantë po marrin edhe tre futbollistët e Kosovës që janë pjesë e skuadrës gjermane: sulmuesi Fisnik Asllani, mesfushori Leon Avdullahu dhe mbrojtësi Albian Hajdari, të cilët po konsiderohen elementë të rëndësishëm në rrugëtimin fantastik të klubit gjerman.
Prania e tyre po e bën këtë histori edhe më interesante për tifozët shqiptarë dhe kosovarë, pasi tre talentë nga Kosova mund ta dërgojnë Hoffenheimin drejt natëve magjike të Champions League.
