Presidenti i FIFA-s, Gianni Infantino, ka konfirmuar zyrtarisht se Irani do të marrë pjesë në Kupën e Botës 2026 dhe do t’i zhvillojë ndeshjet e tij në Shtetet e Bashkuara të Amerikës, duke i dhënë fund çdo spekulimi për një përjashtim të mundshëm të këtij vendi nga turneu.
Deklarata e Infantinos erdhi gjatë Kongresit të FIFA-s në Vancouver, ku ai theksoi se “Irani do të luajë në SHBA”, duke nënvizuar se futbolli duhet të shërbejë si një urë bashkimi, pavarësisht tensioneve politike.
Kjo deklaratë mbyll përfundimisht çdo mundësi që Italia të përfitojë nga situata dhe të rikthehet në Kupën e Botës përmes një vendi të liruar. Përfaqësuesja italiane kishte mbetur jashtë skenarëve aktualë, por zhvillimet e fundit kishin hapur diskutime nëse një përjashtim i Iranit mund të ndryshonte këtë realitet.
Ndërkohë, mungesa e delegacionit iranian në Kongresin e FIFA-s në Kanada ngriti dyshime të mëdha, pasi autoritetet kanadeze nuk lejuan hyrjen e zyrtarëve të federatës iraniane. Sipas raportimeve, kjo lidhej me çështje të vizave dhe tensione diplomatike, ndërsa pala iraniane e cilësoi trajtimin si “sjellje fyese”.
Megjithatë, FIFA ka konfirmuar se këto zhvillime nuk ndikojnë në pjesëmarrjen e Iranit në turneun final.
Sipas planifikimit aktual, Irani do të zhvillojë ndeshjet e fazës së grupeve në SHBA, konkretisht në qytete si Inglewood dhe Seattle. Kundërshtarët e tij në grup janë Zelanda e Re, Belgjika dhe Egjipti.
Kupa e Botës 2026 do të jetë edicioni i parë me 48 ekipe dhe do të zhvillohet nga 11 qershori deri më 19 korrik, me organizim të përbashkët nga SHBA, Kanada dhe Meksika.
