Barcelona ka bërë lëvizjen e parë konkrete për transferimin e Alessandro Bastoni, duke ofruar 45 milionë euro për mbrojtësin e Inter.
Megjithatë, oferta është refuzuar menjëherë nga klubi italian, i cili e konsideron shumë të ulët krahasuar me vlerën reale të lojtarit. Sipas raportimeve nga “Sportmediaset”, “Nerazzurrët” kërkojnë të paktën 60 milionë euro për ta lënë të lirë një nga shtyllat kryesore të mbrojtjes.
Pavarësisht disa muajve të vështirë – nga incidenti në “Derby d’Italia” deri te kartoni i kuq me Italia ndaj Bosnja dhe Hercegovina – Bastoni mbetet një nga mbrojtësit më të vlerësuar në Evropë.
Interesant është fakti se për herë të parë vetë lojtari ka shfaqur gatishmëri për të dëgjuar oferta. Një tentativë e mëhershme nga Chelsea ishte refuzuar shpejt, por interesi i Barcelonës duket më joshës për italianin.
Klubi katalanas është i gatshëm t’i ofrojë Bastonit një pagë rreth 7 milionë euro në sezon, më e lartë se ajo që përfiton aktualisht në Milano, duke i ofruar edhe një sfidë të re në një ambient me ambicie të mëdha.
Negociatat tashmë janë hapur zyrtarisht, por mbetet për t’u parë nëse Barcelona do të rrisë ofertën apo nëse Interi do të lëshojë nga kërkesat e tij për një nga mbrojtësit më të kërkuar në treg.
