Real Madrid po përgatit një tjetër lëvizje të madhe në merkato, teksa drejtuesit e klubit spanjoll synojnë të forcojnë edhe më shumë një skuadër që tashmë konsiderohet ndër më të frikshmet në futbollin evropian.
Me yje si Jude Bellingham, Kylian Mbappé dhe Vinícius Júnior në përbërje, madrilenët vazhdojnë të ndërtojnë një projekt ambicioz për të dominuar futbollin evropian edhe në vitet e ardhshme. Në sezonet e fundit, klubi ka investuar vazhdimisht në emra të mëdhenj, duke sjellë në “Santiago Bernabéu” talente dhe lojtarë të nivelit të lartë.
Sipas raportimeve të mediave gjermane, në krye me Sport Bild, presidenti i klubit madrilen, Florentino Pérez, ka identifikuar objektivin e radhës për merkaton e verës: anësorin ofensiv të Bayern Munich, Michael Olise.
Talenti 24-vjeçar ka qenë një nga lojtarët më të spikatur në skuadrën bavareze dhe konsiderohet një element kyç në projektin sportiv të klubit gjerman. Pikërisht për këtë arsye, drejtuesit e Bayernit nuk kanë ndërmend ta lejojnë largimin e tij lehtë.
Situata komplikohet edhe më shumë nga fakti se kontrata e Olise me klubin gjerman është e vlefshme deri në vitin 2029 dhe nuk përmban klauzolë lirimi. Megjithatë, kjo nuk duket se e ndalon Real Madridin.
Raporti thekson se Pérez është i gatshëm të ofrojë rreth 160 milionë euro për transferimin e sulmuesit, një shifër që do ta shndërronte këtë operacion në një nga transferimet më të mëdha të viteve të fundit.
Nëse një ofertë e tillë do të pranohej nga Bayerni, klubi gjerman do të realizonte një fitim të konsiderueshëm, duke qenë se Olise iu bashkua bavarezëve nga Crystal Palace në verën e vitit 2024.
Megjithatë, madrilenët nuk janë të vetëm në këtë garë. Interes për lojtarin ka shfaqur edhe Liverpool, që e sheh francezin si një pasues të mundshëm të Mohamed Salah, i cili pritet të largohet nga “Anfield” në fund të sezonit.
Pavarësisht kësaj, shumë faktorë mund të ndikojnë në vendimin e Olise, përfshirë edhe pasiguritë rreth të ardhmes së trajnerit Arne Slot dhe mundësinë që Liverpooli të mbetet jashtë UEFA Champions League sezonin e ardhshëm.
Nëse ky transferim realizohet, Real Madridi do të dërgonte një tjetër mesazh të fortë në futbollin evropian: projekti galaktik i “Los Blancos” është ende larg përfundimit.
