Përfaqësuesja e Kosovës në futboll po vazhdon të shkruajë histori, duke regjistruar rritjen më të madhe të pikëve në ranglistën e re të FIFA-s. Falë rezultateve pozitive në ndeshjet e fundit, “Dardanët” kanë bërë një hap të madh përpara në renditjen botërore.
Fitoret ndaj Bullgarisë, Gjibraltarit dhe Kroacisë kanë ndikuar drejtpërdrejt në këtë ngritje, me Kosovën që ka shtuar plot 58.33 pikë – rritja më e madhe nga të gjitha përfaqësueset që nga publikimi i fundit i ranglistës në dhjetor 2025.
Aktualisht, Kosova renditet në vendin e 81-të në botë, duke u ngjitur për 11 pozita dhe duke arritur kështu renditjen më të mirë në histori. Krahasuar me vitet e kaluara, ky është një progres i dukshëm, pasi më herët pozita më e mirë kishte qenë ajo e 91-të.
Në anën tjetër, Shqipëria mban vendin e 71-të, ndërsa Kroacia – të cilën Kosova e mposhti së fundmi – ka pësuar rënie dhe tani renditet në pozitën e 66-të.
Në krye të ranglistës vazhdon të qëndrojë Spanja, e ndjekur nga SHBA-ja, Anglia, Gjermania dhe Japonia, ndërsa dhjetëshen e parë e kompletojnë Brazili, Franca, Suedia, Kanadaja dhe Holanda.
Kosova po kalon një moment të mirë edhe në aspektin konkurrues, pasi aktualisht kryeson grupin në Ligën C të kualifikimeve për Kupën e Botës. Edhe pse kualifikimi direkt nuk është i mundur nga kjo ligë, vendi i parë siguron një vend në “play-off”, si dhe ngjitjen në Ligën B.
Ndërkohë, edhe përfaqësuesja e femrave po shfaq formë të mirë, duke qenë në garë për avancim në Ligën B, çka dëshmon për një rritje të përgjithshme të futbollit kosovar në të dyja konkurrencat.
