Përfaqësuesja e Kosovës në futboll do të paraqitet me fanella të reja duke filluar nga ndeshjet e ardhshme, si rezultat i një bashkëpunimi me gjigantin sportiv “Adidas”.
Federata e Futbollit e Kosovës ka njoftuar se ky bashkëpunim është mundësuar përmes Skemës së Asistencës për Veshje të UEFA-s, e cila synon të mbështesë federatat kombëtare me pajisje cilësore për ndeshje dhe stërvitje.
Sipas FFK-së, fanellat janë të dizajnuara në mënyrë të personalizuar dhe në përputhje me identitetin e ekipit kombëtar, duke reflektuar ngjyrat dhe simbolikën e Kosovës.
“Përmes kësaj skeme, Federata e Futbollit e Kosovës përfiton nga furnizimi me veshje cilësore për ndeshje dhe stërvitje, të dizajnuara në mënyrë të personalizuar dhe në përputhje me identitetin e ekipit”, thuhet në njoftim.
Kjo skemë e UEFA-s është themeluar në vitin 2007 dhe ka për qëllim mbështetjen e federatave kombëtare në zhvillimin e tyre.
Po ashtu, bëhet e ditur se për dy sezonet e ardhshme, dhjetë përfaqësuese evropiane, përfshirë Kosovën, do të paraqiten me dizajne unike të “Adidas”, të zhvilluara në bashkëpunim të ngushtë me federatat përkatëse.
