Arsenali ka siguruar një vend në gjysmëfinalen e UEFA Champions League, duke administruar me kujdes ndeshjen e kthimit ndaj Sporting CP. Barazimi pa gola në “Emirates” ishte i mjaftueshëm për skuadrën e Mikel Arteta, falë fitores minimale 0-1 në takimin e parë.
“Topçinjtë” nuk bindën plotësisht me paraqitjen, por treguan pjekuri taktike duke mos rrezikuar kualifikimin. Ndeshja u karakterizua nga ritëm i ulët dhe pak raste të pastra shënimi, ndërsa prioriteti i londinezëve ishte ruajtja e avantazhit.
Rasti më i mirë për vendasit erdhi nga Leandro Trossard, i cili goditi shtyllën pas një aksioni nga goditja e këndit, duke qenë shumë pranë golit që do të vuloste edhe më herët fatin e sfidës.
Në gjysmëfinale, londinezët do të përballen me Atletico Madrid, një kundërshtar që njihet për organizim të fortë dhe eksperiencë në këtë fazë të garës.
Ndërkohë, për Sportingun mbetet një tjetër eliminim i dhimbshëm, duke vazhduar serinë negative ndaj skuadrave angleze në transfertë.
