Arsenali ka bërë një tjetër hap të madh drejt fitimit të titullit në Premier Ligë, pasi mposhti West Hamin me rezultat minimal 1-0 në derbin londinez. Skuadra e Mikel Artetës tashmë ndodhet vetëm 180 minuta larg një trofeu historik që mungon prej 22 vitesh.
Ndeshja nisi me probleme për “Topçinjtë”, pasi Ben White u detyrua të largohej nga fusha për shkak të një dëmtimi në minutën e 28-të, duke i lënë vendin Zubimendit. Megjithatë, Arsenali vazhdoi të dominojë dhe krijoi raste të shumta shënimi.
Trossard ishte ndër më aktivët në sulm, ndërsa Calafiori gjithashtu rrezikoi portën e vendasve. Në pjesën e dytë, West Ham iu afrua golit me Mateus Fernandes, por portieri David Raya bëri një pritje vendimtare që mbajti në lojë skuadrën e tij.
Momenti që vendosi takimin erdhi në minutën e 83-të, kur Leandro Trossard dërgoi topin në rrjetë me një goditje të saktë me të djathtën, duke shpërthyer festën e tifozëve të Arsenalit.
Në sekondat e fundit, West Ham mendoi se kishte barazuar rezultatin me Wilsonin, por goli u anulua, duke vulosur fitoren e Arsenalit.
Pas kësaj fitoreje, londinezët mbeten pesë pikë përpara Manchester City-t, edhe pse skuadra e Guardiolës ka një ndeshje më pak të zhvilluar. Ndërkohë, West Ham vazhdon të mbetet në zonën e rrezikshme me 36 pikë dhe ende nuk e ka siguruar mbijetesën.
