Gjysmëfinalja mes Arsenalit dhe Atlético Madridit në UEFA Champions League pritet të dhurojë një përballje dramatike, teksa sonte do të mësohet skuadra e parë finaliste.
Ndeshja e parë e zhvilluar në Spanjë përfundoi 1-1, duke lënë gjithçka të hapur për sfidën e kthimit në “Emirates Stadium”.
Sipas rregullores aktuale të kompeticionit, nuk ekziston më rregulli i golit në transfertë. Kjo do të thotë se çdo barazim në kohën e rregullt, pavarësisht rezultatit, nuk përcakton fituesin.
Nëse ndeshja përfundon baras pas 90 minutave, skuadrat do të luajnë kohën shtesë prej dy pjesësh nga 15 minuta. Në rast se barazia vazhdon edhe pas 120 minutave, finalisti do të vendoset me goditje penalltish.
Për Arsenalin, skenari është i qartë: një fitore në kohën e rregullt siguron menjëherë kualifikimin në finale. Në çdo rast tjetër barazimi, londinezët duhet të kërkojnë triumfin në shtesë ose në penallti.
Fituesi i kësaj përballjeje do të sigurojë një vend në finalen e madhe që zhvillohet në Budapest, ku do të përballet me fituesin e çiftit mes Bayern Munich dhe Paris Saint-Germain.
