Derbi i shqiptarëve në kampionatin zviceran ka dhuruar emocione dhe futboll cilësor, teksa Baseli dhe Sioni janë ndarë në një barazim 1-1, në një përballje ku në fushë u aktivizuan plot pesë futbollistë shqiptarë.
Në anën e Basel-it, Xherdan Shaqiri konfirmoi edhe një herë statusin e liderit absolut, duke zhvilluar një paraqitje spektakolare. Ylli shqiptar dhuroi një asist vendimtar dhe u shpall lojtari i ndeshjes, duke u vlerësuar me notën 8.4 nga SofaScore, më e larta e takimit.
Përballë tij, te Sioni, spikati Kreshnik Hajrizi, i cili u shndërrua në një “mur” në mbrojtje. Qendërmbrojtësi shqiptar ndërhyri në disa momente kyçe, duke shmangur gola të sigurt dhe u vlerësua me notën 8.0, një nga performancat më të mira të sezonit për të.
Në këtë duel u paraqitën gjithashtu edhe Donat Rrudhani, Benjamin Kololli dhe Rilind Nivokazi. Nivokazi regjistroi një asist, por u vlerësua me 6.9, ndërsa Rrudhani mori notën 6.3, duke u detyruar të largohej nga fusha për shkak të një dëmtimi.
Ky barazim konsiderohet si një hap prapa për Baselin, i cili “humbi” dy pikë të rëndësishme në garën për titull. Skuadra e Shaqirit tani numëron 33 pikë, plot 10 më pak se lideri Thun.
Nga ana tjetër, Sioni vazhdon një sezon të qëndrueshëm dhe mban vendin e pestë në renditje me 31 pikë, duke mbetur në zonën konkurruese të tabelës.
Një ndeshje që konfirmoi edhe një herë peshën dhe ndikimin e futbollistëve shqiptarë në elitën e futbollit zviceran.
